11:40 - 25.06.2026

---

25 iyun, Fineko/abc.az. İnsan hüquqlarının qorunması ilə iqtisadi şəffaflıq arasında əlaqə müasir dövrdə daha da güclənib və audit bu prosesdə hüquqi dövlətin əsas iqtisadi dayaqlarından birinə çevrilib.

ABC.AZ xəbər verir ki, bunu Auditorlar Palatasının sədri Vahid Novruzov Bakıda keçirilən "Dövlətin və təsərrüfat subyektlərinin mənafelərinin müdafiəsində auditin rolu" mövzusunda beynəlxalq konfransda bildirib.

Onun sözlərinə görə, mülkiyyət, sahibkarlıq, sosial-iqtisadi hüquqlar, investorların qanuni gözləntiləri, maliyyə vəsaitlərinin istifadəsində ictimai maraq və vətəndaşların rifah hüququ şəffaf maliyyə idarəetməsi olmadan tam təmin oluna bilməz:

"Bu baxımdan audit təkcə texniki peşə deyil, hüquqi dövlətin iqtisadi əsaslarını möhkəmləndirən mühüm institutdur. Audit rəqəmlərin arxasında dayanan həqiqəti, hesabatların arxasında dayanan məsuliyyəti, iqtisadi qərarların arxasında dayanan etibarlılığı üzə çıxarır. Auditor rəyi sadəcə maliyyə sənədi deyil, müəssisənin idarəetmə mədəniyyəti, maliyyə intizamı və bazar iştirakçıları qarşısında etibarlılığı barədə peşəkar mövqedir".

V.Novruzov qeyd edib ki, müstəqil audit iqtisadi münasibətlər sistemində müəssisələrlə səhmdarlar və investorlar arasında "etimad körpüsü" rolunu oynayır:

"Etimadın zəifləməsi investisiyaların azalmasına, bunun isə sahibkarlıq mühitinə, məşğulluğa, vergi daxilolmalarına və sosial rifaha mənfi təsir göstərməsinə səbəb olur. Son illər auditin mahiyyəti də ciddi şəkildə dəyişib. Əgər əvvəllər audit əsasən məcburi yoxlama və formal hesabat proseduru kimi qəbul olunurdusa, indi o, biznesin qorunması, risklərin qabaqlanması və davamlı inkişafını təmin edən idarəetmə alətinə çevrilib. Audit formal nəzarət düşüncəsindən etibarlı təminat, risk əsaslı əminlik və qabaqlayıcı idarəetmə modelinə keçidi təmin edir. Bu isə sahibkarların, səhmdarların, investorların və əmanətçilərin hüquqlarının daha etibarlı qorunması deməkdir".

©Report