17:35 - 14.08.2026

---

14 avqust, Fineko/abc.az. ABŞ administrasiyası Avropa İttifaqına (Aİ) rəsmi məktub ünvanlayaraq, Birlik tərəfindən tətbiq edilən Ətraf Mühit, Sosial və Korporativ İdarəetmə (ESG) qaydalarının ləğv olunmasını tələb edib. Vaşinqton xəbərdarlıq edib ki, əks halda "ABŞ ticarətinə yaradılan əsassız maneələri aradan qaldırmaq üçün bütün zəruri addımlar atılacaq".

Məktubla yanaşı, ABŞ-nin Aİ-dəki səfiri Endryu Puzder bəyan edib ki, Brüssel amerikalı şirkətlərin qeyri-bərabər şəraitlə qarşılaşmaması barədə verdiyi vədləri yerinə yetirməlidir. Bu addım Korporativ Davamlılıq Hesabatlılığı Direktivi (CSRD) və Korporativ Davamlılıq üzrə Müvafiq Araşdırma Direktivi (CSDDD) ətrafında ABŞ və Aİ arasında gərginliyi yenidən artırıb. Mətnləri bir qədər yumşaldılsa da, bu qaydalar Aİ ərazisində fəaliyyət göstərən bütün xarici şirkətlərdən ekoloji və sosial təsirlərini açıqlamağı tələb edir.

ABŞ tərəfi Aİ-nin bəzi müsbət islahatlar apardığını etiraf etsə də, bunların amerikalı sahibkarların narahatlığını tam aradan qaldırmadığını bildirir. Vaşinqtonun qənaətinə görə, tələblərin transsərhəd xarakteri və yaratdığı əlavə maliyyə yükü ABŞ şirkətlərinin Avropada azad rəqabət aparmasına mane olur.