12:18 - 14.08.2026

---

14 avqust, Fineko/abc.az. Beynəlxalq reytinq agentliyi "Fitch Ratings" ABŞ-ın uzunmüddətli kredit reytinqini "AA+" səviyyəsində təsdiqləyib, reytinq üzrə proqnozu isə "stabil" olaraq müəyyən edib.

Agentliyin açıqlamasında bildirilir ki, ABŞ-ın böyük iqtisadiyyatı, adambaşına düşən yüksək gəlir səviyyəsi, dinamik biznes mühiti və dolların əsas qlobal ehtiyat valyuta olmasından qaynaqlanan maliyyələşmə çevikliyi reytinqi dəstəkləyən əsas amillərdir.

Bununla yanaşı, yüksək büdcə kəsirləri, böyük faiz yükü və yüksək dövlət borcu ölkənin kredit reytinqinə təzyiq göstərməkdə davam edir. ABŞ-ın dövlət borcunun Ümumi Daxili Məhsula (ÜDM) nisbətinin 2025-ci ilin sonundakı 117%-dən 2028-ci ilin sonunadək 123%-ə yüksələcəyi proqnozlaşdırılır.

Əsas iqtisadi gözləntilər:

• İqtisadi artım: Yüksək gömrük rüsumları və qeyri-müəyyənliklərə baxmayaraq, ABŞ iqtisadiyyatının 2026-2027-ci illərdə 1,9% artacağı gözlənilir;

• İnflyasiya: İllik inflyasiyanın bu il orta hesabla 3,4% səviyyəsində olacağı və yalnız 2028-ci ilin sonuna doğru FED-in 2%-lik hədəfinə yaxınlaşacağı ehtimal edilir;

• Dövlət borcu limiti: ABŞ hökumətinin 41,1 trilyon dollarlıq qanuni borclanma həddinə 2027-ci ilin ortalarında çatacağı nəzərdə tutulur.