10:35 - 24.08.2026

---

24 avqust, Fineko/abc.az. Qlobal birjalarda həftə ehtiyatlı pozisiyada başlayıb. Ötən həftənin sonunda ABŞ-da açıqlanan güclü İşgüzar Fəallıq İndeksi (PMI) göstəriciləri birjalara dəstək versə də, bu həftə gözlənilən "Nvidia"nın maliyyə hesabatı və Fed sədri Kevin Uorşun (Kevin Warsh) "Jackson Hole" konfransındakı çıxışı öncəsində investorlar riskli addımlardan çəkinirlər.

• Səhm Bazarları: "Dow Jones" 1% yüksəlib, "Nasdaq 100" beşgünlük enişə son qoyub. Lakin yeni həftənin fyuçersləri mənfi zonadadır.

• Asiya Birjaları: "MSCI Asia Pacific" indeksi 1% geriləyib. Səhmdarlara 80 mlrd. dollar qaytarmaq planına baxmayaraq "Samsung" 8,7%, 10,2 mlrd. dollarlıq səhm satışı elan edən "Alibaba" 9,6%, rekord istiqraz emissiyasına hazırlaşan "SoftBank" isə 4,9% dəyər itirib.

• Xammal və Qiymətli Metallar: "Brent" nefti 1,3% ucuzlaşaraq 93,20 dollara düşüb. ABŞ dollarının zəifləməsi fonunda investorların təhlükəsiz limanlara yönəlməsi qızılın qiymətini 4 640 dollar/ons səviyyəsinə qaldıraraq son 3 ayın maksimumuna yaxınlaşdırıb.

• İstiqrazlar: ABŞ Xəzinədarlıq naziri Skott Bessentin (Scott Bessent) uzunmüddətli istiqrazları geri alacağını açıqlamasından sonra ABŞ-ın 10 illik istiqraz gəlirliliyi 4,71%-ə enib.