16:23 - 12.08.2026

---

12 avqust, Fineko/abc.az. Norveç Bankının İnvestisiya İdarəetməsi (Norges Bank Investment Management) tərəfindən idarə olunan 2,3 trilyon dollar həcmindəki Suveren Fondu ikinci rübdə 11,5% gəlirlilik nümayiş etdirib. Bu göstərici 2020-ci ilin analoji dövründən bu yana qeydə alınan ən yüksək nəticədir.

Rüb ərzində səhm investisiyaları 16% gəlirliliklə əsas artım drayveri olub. Sabit gəlirli qiymətli kağızlar portfelə 1,1%, daşınmaz əmlak və infrastruktur investisiyaları isə 1,8% töhfə verib.

Fondun icraçı direktoru Nikolay Tangen nəticələri şərh edərkən bildirib: "Yüksək gəlirlilik fond bazarındakı, xüsusilə də Asiyanın texnologiya şirkətlərinin səhmlərindəki müsbət dinamika ilə bağlıdır".

Əsas investisiya göstəriciləri:

• Qlobal payı: Dünyada birjada tədavül edən bütün səhmlərin təxminən 1,5%-nə sahib olan fond süni intellekt sektorunun ən böyük investorlarından birinə çevrilib.

• İri aktivləri: İlin birinci yarısının yekunlarına görə, portfeldə ən böyük paya sahib şirkət Nvidia olub, onu Microsoft və Apple izləyib.

• Yarımillik nəticə: İlin ilk yarısında ümumi gəlirlilik 9,4% təşkil edərək fondun etalon indeksini (benchmark) 22 bazis bəndi üstələyib. Telekommunikasiya, texnologiya və energetika sektorlarının liderlik etdiyi bu göstərici 2025-ci ildəki 15,1%-lik artımın ardınca qeydə alınıb.