21:51 - 19.08.2026
19 avqust, Fineko/abc.az. Rusiyada benzin və dizel qıtlığı yenidən kəskinləşib. Avqust ayının ortalarından etibarən ölkə üzrə yanacaq tapılan yanacaqdoldurma məntəqələrinin payı 41%-dən 28,1%-ə düşüb. Ölkənin cənub regionlarında, Volqaboyunda və hətta Moskvada uzun növbələr yaranıb, bir çox məntəqələrdə benzin tamamilə bitib.
Orenburq, Lipetsk və Sevastopol kimi bölgələrdə avtomobillərin dövlət qeydiyyat nişanlarının son rəqəminə görə (tək və cüt günlər üzrə) yanacaq satışı, QR-kod sistemi və bir nəqliyyat vasitəsinə 20-30 litrlik limitlər bərpa olunub. Böhranın əsas səbəbləri kimi neft emalı zavodlarının sıradan çıxması, PUA hücumları, yay mövsümündə artan tələbat və logistik problemlər göstərilir.
Daxili bazarda təklifi artırmaq üçün Rusiya hökuməti benzin ixracına qoyulan qadağanı 2027-ci il yanvarın 31-dək uzadıb. Bundan əlavə, ölkə Belarus, Qazaxıstan, Hindistan və Mərakeşdən benzin idxal etməyə başlayıb, həmçinin ekoloji standartı aşağı olan Euro-2, Euro-3 və Euro-4 markalı yanacaqların istehsalı və satışına müvəqqəti icazə verilib.
