15:45 - 14.08.2026

---

14 avqust, Fineko/abc.az. 2026-cı ilin yanvar-iyul aylarında Azərbaycanda nəqliyyat və anbar təsərrüfatı sahəsində göstərilən xidmətlərin həcmi ötən ilin eyni dövrü ilə müqayisədə real ifadədə 7,1% artaraq 9 milyard 206,6 milyon manat təşkil edib.

Dövlət Statistika Komitəsinin məlumatına görə, xidmətlərin 60,1%-i (5 milyard 530,7 milyon manat) yük daşınması, 27,4%-i (2 milyard 522,9 milyon manat) sərnişin daşınması, 12,5%-i (1 milyard 153 milyon manat) isə anbar təsərrüfatı və poçt xidmətlərinin payına düşüb.

Hesabat dövründə nəqliyyat sektoru üzrə yük daşınması 2,8% artaraq 140,8 milyon ton olub. Yüklərin 63%-i avtomobil, 25,9%-i boru kəməri, 7,4%-i dəmir yolu, 3,6%-i dəniz və 0,1%-i hava nəqliyyatı ilə daşınıb. Sərnişin daşınması isə 8,6% artaraq 1 milyard 290 milyon nəfərə çatıb ki, bunun da 89,3%-i avtomobil nəqliyyatının, 10%-i isə metronun payına düşüb.