10:44 - 7.08.2026

---

7 avqust, Fineko/abc.az. Geopolitik risklərin artması və neft qiymətlərinin yüksəlməsi fonunda ABŞ hissə sənədləri və istiqrazları ucuzlaşıb.

"Brent" markalı neftin bir barelinin qiymətinin 83 dolları aşması ABŞ Federal Ehtiyat Sisteminin (FED) faiz dərəcələrini artırmaq məcburiyyətində qalacağı ilə bağlı narahatlıqları alovlandırıb. Nəticədə S&P 500 indeksi ardıcıl ikinci gün düşüş yaşayıb,

Nasdaq 100 indeksi isə 0,4% geriləyib. Piyasaların əsas diqqəti ABŞ-da açıqlanacaq kənd təsərrüfatı xaric məşğulluq göstəricilərinə (Non-Farm Payrolls) yönəlib.

Hörmüz boğazının açılması ilə bağlı razılaşmanın qeyri-müəyyən qalması səbəbindən "Brent" nefti 1,6% artaraq 83,80 dollara yüksəlib.

Bununla yanaşı, həftənin əvvəlindəki diplomatik ümidlər sayəsində neft həftəlik bazda təxminən 5% ucuzlaşma nümayiş etdirir. Yüksək enerji qiymətləri fonunda 10 illik ABŞ Xəzinədarlıq istiqrazlarının gəlirliliyi 4,68% səviyyəsində qərarlaşıb. Asiya birjalarında da geriləmə müşahid olunub, Bloomberg Dolar İndeksi isə sabit qalıb.