11:31 - 19.06.2026

---

19 iyun, Fineko/abc.az. Dünyanın aparıcı investisiya banklarından olan "Goldman Sachs", ABŞ mərkəzi bankının (Fed) cari ildə faiz dərəcələrini azaldacağına dair gözləntilərin zəifləməsi səbəbindən 2026-cı ilin sonu üçün qızılın qiymət proqnozunu unsiya başına 500 dollar aşağı salıb.

ABC.AZ xəbər verir ki, bank dekabr ayı üçün hədəf qiymətini əvvəlki 5400 dollardan 4900 dollara endirib. "Goldman Sachs" analitikləri Lina Tomas və Daan Streyven tərəfindən investorlara ünvanlanmış hesabatda qeyd olunur ki, yeni hədəf səviyyəsi ilin ikinci yarısında qızılın yüksəliş trendini qoruyacağını göstərsə də, bu artım əvvəlki proqnozlara nisbətən daha məhdud çərçivədə baş verəcək.

İnvestisiya hesabatının əsas iqtisadi markerləri:

Fed proqnozunun dəyişməsi: "Goldman Sachs" iqtisadçıları Fed-in pul-kredit siyasətini yumşaltma mərhələsinə keçidini növbəti ilə keçiriblər. Bank artıq faiz endirimlərinin bu il deyil, yalnız gələn ilin iyun və dekabr aylarında baş tutacağını ehtimal edir. Fed-in son iclasındakı "şahin" ritorikası və ABŞ-da faizlərin yüksək qalması gəlirsiz aktiv olan qızıla marağı qismən azaldıb.

ETF daxilolmalarında zəifləmə: Analitiklər həmçinin qızıla yönəlmiş ETF (birja investisiya fondları) daxilolmalarının əvvəlki proqnozlaşdırılan səviyyədən aşağı olacağını gözləyirlər.

Struktur mövqe sabitdir: Ekspertlər qeyd edirlər ki, qızılın orta və uzunmüddətli perespektivlərinə dair struktur baxış müsbət olaraq qalır, lakin yaxınmüddətli risklər səbəbindən taktiki ehtiyat nümayiş etdirilməlidir. Fed tərəfindən faizlərin yenidən artırılması ssenarisində qızılın unsiya qiyməti ilin sonuna qədər 4400 dollara qədər korreksiya oluna bilər.