14:39 - 14.08.2026

---

14 avqust, Fineko/abc.az. Azərbaycan Prezidenti İlham Əliyev Milli Məclis tərəfindən qəbul edilmiş "Büdcə sistemi haqqında", "Hesablama Palatası haqqında" və "Sığorta fəaliyyəti haqqında" qanunlarda dəyişiklik edilməsi barədə qanunu təsdiqləyib.

Dəyişikliklərə əsasən, Hesablama Palatasına Naxçıvan Muxtar Respublikasının büdcə nəzarəti və sığorta sirrinə çıxışla bağlı yeni səlahiyyətlər verilir.

Yeniliklər və yeni səlahiyyətlər:

• Naxçıvan Muxtar Respublikası üzrə: Palata Naxçıvanın büdcə layihəsinə, onun icrasına, müvafiq qanun layihələrinə və illik hesabatlara rəy verə biləcək;

• Nəzarət çərçivəsi: Qurum muxtar respublikadakı büdcədənkənar dövlət fondlarının, məqsədli fondların, publik hüquqi şəxslərin vəsaitlərinə, dövlət zəmanətli kreditlərə, qrantlara və texniki yardımlara nəzarət etmək hüququ qazanıb;

• Sığorta sirrinə çıxış: Hesablama Palatası sığorta bazarının peşəkar iştirakçılarının əldə etdiyi və sığorta sirri hesab edilən məlumatlara çıxış imkanı əldə edib.