21:59 - 5.08.2026

---

5 avqust, Fineko/abc.az. ABŞ Maliyyə Nazirliyi İraqın "Fly Baghdad" aviaşirkətini və ona məxsus təyyarələri "Qara siyahı"dan (SDN) çıxarıb. Şirkət 2024-cü ilin yanvar ayında İran İslam İnqilabı Keşikçiləri Korpusunun (SEPAH) "Qüds Qüvvələri"nə və regiondakı müttəfiq qruplaşmalara dəstək vermək ittihamı ilə sanksiyalara məruz qalmışdı.

ABŞ Xarici Aktivlərə Nəzarət İdarəsi (OFAC) antimüharibə və antiterror sanksiyaları siyahısında yenilənmə apararaq "Fly Baghdad" (digər adı ilə "Iraq Express") üzərindəki məhdudiyyətləri ləğv edib. Nazirlik rəsmilərinin bildirdiyinə görə, şirkət öz əməliyyatlarında ciddi dəyişikliklər etdiyini nümayiş etdirib və inzibati baxış nəticəsində məhdudiyyətlərin davam etdirilməsinə ehtiyac qalmayıb.

Bununla belə, qərarın birbaşa İraqa aid addım olmasına baxmayaraq, ABŞ və İran arasında Vaşinqton, Tehran və Umman vasitəsilə diplomatik danışıqların intensivləşdiyi və məhdudiyyətlərin yumşaldılması müzakirələrinin aparıldığı bir vaxta təsadüf etməsi diqqət çəkir.