10:29 - 27.02.2025
27 fevral, Fineko/abc.az. İslam maliyyələşdirmə bazarının ümumi həcmi 2025-ci ilin sonuna qədər 5,3 trilyon dollara çatacaq, 2030-cu ilə qədər isə 9 trilyon dollara qədər artım proqnozlaşdırılır.
ABC.AZ xəbər verir ki, bu barədə İslam bankları və maliyyə institutları Baş Şurasının (CİBAFI) baş katibi Abdelilah Belatik məlumat verib.
"Biz gözləyirik ki, 2025-ci ilin sonuna qədər İslam maliyyə bazarının ümumi həcmi 5,3 trilyon dollara çatacaq. Müqayisə üçün, 2010-cu ildə bu rəqəm 1 trilyon dollar idi, 2024 - cü ilə qədər isə 4,5 - 4,7 trilyon dollara yüksəlmişdi. 14 il ərzində dörd dəfə artım olub", — deyə o qeyd edib.
Onun sözlərinə görə, 2029-2030-cu illər üzrə proqnozlar təxminən 9 trilyon dollar səviyyəsinə çatdığını göstərir.
"Seqment analizinə görə, bazarın 70%-dən çoxu İslam maliyyələşdirməsinə, təxminən 15%-i islam fondlarına düşür, takaful (İslam sığortası) isə kiçik bir paya sahibdir. Bununla yanaşı, bu göstəricilərə halal sənayesinin ən böyük bazarı daxil deyil", — Belatik əlavə edib.
