16:55 - 26.07.2024

---

26 iyul, Fineko/abc.az. Ankara Avropa ölkələrinin enerji təhlükəsizliyinə töhfə vermək məqsədilə təbii qaz idxalının artırılması üzrə addımları davam etdirir. Bu baxımdan biz türkmən qazının Türkiyəyə tədarükünə başlamağı və sonradan Avropaya ixracını vacib hesab edirik. 

ABC.AZ xəbər verir ki, bu barədə Türkiyənin energetika və təbii sərvətlər naziri Alparslan Bayraktar bildirib.

Nazir xatırladıb ki, Türkmənistanla enerji əməkdaşlığı mövzusu artıq uzun müddətdir Ankaranın gündəmindədir.

“Addım-addım Türkmənistanla enerji əməkdaşlığını həyata keçirməyi planlaşdırırıq. İlk mərhələdə qonşu İran və Azərbaycanla türkmən qazının svop tədarükü üzrə razılığın əldə edilməsi mümkündür”, - deyə Türkiyənin energetika və təbii sərvətlər naziri qeyd edib.

Bayraktar bildirib ki, Türkmənistan qazının tədarükü ilə bağlı Ankara ilə Bakı arasında artıq ümumi razılıq əldə olunub. “Biz ilkin olaraq Azərbaycan və İran vasitəsilə 2 milyard kubmetrə qədər türkmən qazı alacağımızı proqnozlaşdırırıq”, - deyə energetika və təbii sərvətlər naziri dəqiqləşdirib və Türkiyənin boru kəmərləri şəbəkələri ilə qonşu ölkələrdən qazın nəqli imkanının genişləndirilə biləcəyini qeyd edib.