11:14 - 15.01.2020

---

15 yanvar, Fineko/abc.az. 2019-cu ildə Azərbaycanda qeydiyyata alınan hüquqi şəxslərin sayı 2018-ci ilin müvafiq dövrü ilə müqayisədə 33,2 faiz artıb. Yerli investisiyalı məhdud məsuliyyətli cəmiyyətlərin e-qeydiyyatının xüsusi çəkisi isə 81,8 faizdən 89 faizə yüksəlib.

ABC.AZ Vergilər Nazirliyinə istinadən xəbər verir ki, 2019-cu ildən tətbiq olunan elektron qeydiyyatla (fin kod+mobil nömrə) 955 hüquqi şəxs dövlət qeydiyyatına alınıb. Başqa sözlə, yerli investisiyalı məhdud məsuliyyətli cəmiyyətlərin illik qeydiyyatının 8,6 faizinin yeni üsulla aparılması təmin olunub.

2019-cu ilin son yeddi ayında yerli investisiyalı məhdud məsuliyyətli cəmiyyətlər üzrə elektron qeydiyyatın xüsusi çəkisi 90 faizdən çox olub. Dekabr ayında isə bu göstərici 91,6 faiz təşkil edib. 2020-ci ilin 1 yanvar tarixinə 167 publik hüquqi şəxs dövlət qeydiyyatında olub. 2020-ci il yanvarın 1-dək 14 min 388 xarici investisiyalı kommersiya qurumu qeydiyyata alınıb. Onlardan 784-ü və ya 5,4 faizi ləğv edilib. Hazırda qeydiyyatda olan 13 min 604 xarici investisiyalı kommersiya qurumundan 2 min 753-ü müştərək (Azərbaycan Respublikasının fiziki və hüquqi şəxsləri ilə birlikdə təsis edilmiş) hüquqi şəxslər, 10 min 851-i tam xarici investisiyalı müəssisələr, o cümlədən 2 705-i xarici şirkətlərin Azərbaycan Respublikasında yaradılmış filial və ya nümayəndəliyidir.

Müəllif: Elmir Murad