11:25 - 18.08.2026

---

18 avqust, Fineko/abc.az. İranla sülh sazişinə dair ümidlərin azalması və yüksək neft qiymətlərinin inflyasiyanı artıracağı ilə bağlı narahatlıqlar qlobal səhmdar və istiqraz bazarlarında kəskin düşüşə gətirib çıxarıb.

ABŞ Prezidenti Donald Trampın İranla müvəqqəti atəşkəs müqaviləsini uzatmaq niyyətində olmadığını bildirməsi və Livanın cənubunda toqquşmaların yenidən şiddətlənməsi geostrateji riskləri daha da artırıb. Bu gərginlik fonunda "Brent" markalı neftin bir barelinin qiyməti 91,3 dollara yüksəlib.

Neftin bahalaşması ABŞ Federal Ehtiyat Sisteminin (FED) ilin sonunadək faiz dərəcələrini artıra biləcəyi barədə ehtimalları gücləndirib və 30 illik ABŞ xəzinə istiqrazlarının gəlirliliyini 2007-ci ildən bəri ən yüksək həddə çatdırıb.

Analitiklər bildirirlər ki, yüksək neft qiymətləri, artan istiqraz gəlirliliyi və siyasi risklərin kəsişməsi bazarlarda dəyişkənliyi saxlayacaq. Hadisələrin təsiri ilə Asiya birjalarında "MSCI" indeksi 0,8%, Yaponiyanın "Nikkei 225" indeksi 2%, Cənubi Koreyanın "Kospi" indeksi isə 2% geriləyib. Qızılın qiyməti isə bir unsiya üçün təxminən 4 400 dollar səviyyəsində sabitliyini qoruyub.