16:52 - 25.12.2025

---

25 dekabr, Fineko/abc.az. 2025-ci ilin may ayında Kuba bankları “Mir” ödəniş sisteminə aid kartların buraxılışına başlayıb və Rusiya kartları Kubada istifadəyə verilib. Daha əvvəl ölkə İranın “Şetab” sistemi ilə də inteqrasiya olunub. Bununla belə, bir çox dövlətlərdə “Mir” kartlarından istifadə hələ də məhdudlaşdırılıb və ya ümumiyyətlə mümkün deyil.

ABC.AZ xəbər verir ki, əvvəllər sistemin operatoru olan NSPK “Mir” kartlarının 13 ölkədə qəbul edildiyini bildirmişdi, lakin sonradan bu siyahı rəsmi saytdan çıxarılıb. Hazırda xaricdə kartların işləməsi ilə bağlı məlumatlar əsasən KİV-lərin məlumatları və səyahətçilərin rəyləri əsasında formalaşır.

2024-cü ilin iyul ayında Rusiyanın xarici işlər nazirinin müavini Mixail Qaluzin bildirmişdir ki, Azərbaycanda “Mir” kartları ilə vəsaitlərin nağdlaşdırılması mümkün olub. Bu imkan VTB-nin Azərbaycan törəməsinin bankomatlarında mövcuddur. Lakin turistlər bu əməliyyatın hər zaman alınmadığını qeyd edirlər. Eyni zamanda, terminallar vasitəsilə alış-verişin ödənişi mümkün deyil.

Müqayisə üçün qeyd edək ki, Ermənistanda “Mir” kartlarını yalnız VTB Armenia bankı nağd pul çıxarışı üçün qəbul edir, Gürcüstanda isə bu ödəniş sistemi ümumiyyətlə işləmir.