10:19 - 18.06.2026
18 iyun, Fineko/abc.az. Azərbaycan həm ölkə daxilində, həm də dövlət hüdudlarından kənarda beynəlxalq ölçüyə malik irimiqyaslı infrastruktur layihələrinə çox böyük sərmayələr yatırır.
ABC.AZ xəbər verir ki, bu barədə Prezident İlham Əliyev İslam İnkişaf Bankı Qrupunun (İİB) 2026-cı il üzrə İllik Toplantılarının açılış mərasimindəki çıxışında bəyan edib.
Dövlət başçısı vurğulayıb ki, rəsmi Bakının əsas hədəfi Azərbaycanı açıq dənizə çıxışı olmayan coğrafi mövqedən qlobal logistika və beynəlxalq daşımalar qovşağına çevirməkdir.
İqtisadi şaxələndirmə və xarici borc: Prezident qeyd edib ki, ölkə iqtisadiyyatının qeyri-neft sektoru hesabına şaxələndirilməsi artıq bir reallıqdır və rəsmi Bakı bu istiqamətdə səylərini qətiyyətlə davam etdirəcək. İqtisadi inkişafla bağlı hər hansı bir çətinliyin gözlənilmədiyini deyən İlham Əliyev, xarici dövlət borcunun idarə edilməsi istiqamətində son illər ərzində böyük nailiyyətlərin əldə olunduğunu və yeni dövrdə planların daha geniş olduğunu diqqətə çatdırıb.
Genişmiqyaslı sosial paketlər: Ölkədə icra olunan sosial proqramlara da toxunan dövlət başçısı onların genişmiqyaslı xarakter daşıdığını bildirib. Qeyd olunub ki, son bir neçə il ərzində əhalinin rifahının yüksəldilməsi məqsədilə ardıcıl və irihəcmli sosial dəstək paketləri uğurla həyata keçirilib.
