17:11 - 11.09.2026

---

11 sentyabr, Fineko/abc.az. 2026-cı ilin yanvar-avqust aylarında Azərbaycanda nəqliyyat və anbar təsərrüfatı sahəsində 10 milyard 931,9 milyon manatlıq xidmət göstərilib.

Dövlət Statistika Komitəsinin məlumatına görə, bu, ötən ilin müvafiq dövrü ilə müqayisədə real ifadədə 8,7% çoxdur. Ümumi xidmətlərin 59,4%-i (6,5 mlrd manat) yük, 28,1%-i (3,1 mlrd manat) sərnişin daşınmasının, 12,5%-i (1,4 mlrd manat) isə anbar və poçt xidmətlərinin payına düşüb.

Səkkiz ay ərzində nəqliyyat sektoru üzrə 162,7 milyon ton yük daşınıb ki, bu da illik müqayisədə 3% artım deməkdir. Yükdaşımaların əsas hissəsi avtomobil (63,4%) və boru kəməri (25,3%) nəqliyyatının payına düşüb. Dəmir yolu ilə 7,5%, dəniz yolu ilə 3,6%, hava nəqliyyatı ilə isə 0,2% yük daşınıb.

Hesabat dövründə sərnişin daşınması 9,6% artaraq 1 milyard 491,1 milyon nəfərə çatıb. Sərnişinlərin mütləq əksəriyyəti — 89,8%-i avtomobil nəqliyyatından, 9,5%-i metrodan, 0,7%-i isə digər nəqliyyat vasitələrindən istifadə edib.