22:26 - 25.08.2026

---

25 avqust, Fineko/abc.az. Kanada hökumətinin rəsmi bəyanatına əsasən, ABŞ-dən idxal olunan 700-dən çox məhsulu hədəf alan cavab rüsumları 8 sentyabr tarixindən qüvvəyə minəcək.

ABŞ-nin 20 milyard dollar dəyərində Kanada idxalına 50% nisbətində yeni vergilər tətbiq etməsi və ticarət danışıqlarının uğursuzluqla nəticələnməsindən sonra qəbul edilən bu qərar iki ölkə münasibətlərində yeni böhran mərhələsindən xəbər verir. Yeni qərara əsasən polad, alüminium, mebel və geyim sektorlarına 50%, pendir, məişət texnikası və dəniz məhsullarına 25%, elektronika və əl alətlərinə isə 15% dərəcəsi ilə gömrük rüsumu tətbiq ediləcək.

Kanadanın Maliyyə naziri Fransua-Filipp Şampan bildirib ki, rüsumların mənfi təsirlərini yumşaltmaq üçün cavab tədbirləri Kanada iqtisadiyyatının əsas dayaqlarını qorumağa yönəlib. Bu çərçivədə hökumət kiçik və orta sahibkarlara, işçilərə və fermerlərə maliyyə dəstəyi göstərmək məqsədilə 7,5 milyard Kanada dolları həcmində stimullaşdırıcı paket elan edib.