09:58 - 17.08.2026

---

17 avqust, Fineko/abc.az. ABŞ dollarının zəifləməsi və son açıqlanan mülayim makroiqtisadi göstəricilərin ABŞ Federal Ehtiyat Sisteminin (FED) gələn ay faiz artıracağı ehtimallarını azaltması fonunda qızıl qiymətləri yeni həftəyə yüksəlişlə başlayıb.

Spot qızılın qiyməti 0,4% artaraq bir unsiya üçün 4.391,07 dollara yüksəlib. Qeyd edək ki, qiymətlər keçən həftə son iki ayın en yüksək səviyyəsinə çatmışdı. Dekabr fyuçersləri üzrə ABŞ qızıl kontraktları da 0,3% bahalaşaraq 4.448,10 dollara çatıb.

Dollar indeksinin 0,1% geriləməsi qızılı digər valyutalara sahib olan investorlar üçün daha cazibədar edib. "KCM Trade"in baş bazar analitiki Tim Uoterer bildirib ki, zəif inflyasiya göstəriciləri dolları təzyiq altında saxlayır və qiymətlərin 4.400 dollar səviyyəsinə doğru irəliləməsinə şərait yaradır. Analitikin sözlərinə görə, qiymətin 4.500 dollar üzərində sabitləşməsi üçün dolların daha çox dəyər itirməsi və ya enerji qiymətlərində eniş yaşanması tələb oluna bilər.

ABŞ-də iyul ayı üzrə kənd təsərrüfatından kənar məşğulluq göstəricilərinin azalan dinamika göstərməsi və istehlak inflyasiyasının məhdud qalması FED-in sentyabrda faiz artırmaq ehtimalını zəiflədib. "CME FedWatch" məlumatlarına əsasən, bazar iştirakçıları sentyabr ayında faiz artırımı ehtimalını 30% olaraq qiymətləndirir (bir ay əvvəl bu göstərici 47% idi). Faizlərin aşağı düşməsi gəlir gətirməyən qızılı saxlamanın alternativ xərcini azaldır.

Hazırda investorlar FED-in iyul iclasının çərşənbə günü dərc olunacaq tutanaqlarına diqqət yetiriblər. Jeopolitik cəbhədə isə ABŞ nümayəndələri Misir, Qətər və Türkiyədən olan vasitəçilərlə Qahirədə bir araya gələrək Qəzza sülh planını müzakirə ediblər.