11:54 - 17.09.2026

---

17 sentyabr, Fineko/abc.az. Şəhər daxili hərəkəti təmin edən ictimai nəqliyyat sistemləri, müxtəlif ölkələrdə fərqli qiymət siyasətinə və özünəməxsus çətinliklərə malikdir.

Regional tarifləri daha ətraflı nəzər salsaq ilk olaraq, Tiflisdə ictimai nəqliyyatdan, metro və avtobuslar da daxil olmaqla, istifadə etmək bir gediş üçün 1 lari qiymətindədir. Lakin, pik saatlarda sıxlıq və bəzən avtobusların gecikmələri problemlər yarada bilir.

Türkiyədə, xüsusilə İstanbulda isə bu qiymət daha yüksəkdir. Burada standart gediş haqqı 46,20 lirə təşkil edir və tıxaclar sərnişinlərin vaxtında çatmasına ciddi təsir göstərir. Ermənistanın paytaxtı Yerevanda isə ictimai nəqliyyatdan istifadə etmək 150 dram tələb edir və şəhərdə hələ də köhnə avtobuslar və məhdudlaşdırılmış metro infrastrukturu əsas çətinliklərdəndir.

Nəhayət, Rusiyada, daha dəqiq desək Moskvada, "Troyka" kartı ilə metroya və ya yerüstü nəqliyyata minmək 75 rubl başa gəlir. Çox müasir sistemə malik olsa da, əhalinin çoxluğu səbəbindən pik saatlarda sıxlıq və qatar tıxacları yaşanır.

Bakıda gediş haqqı 60 qəpikdir, baş verən əsas sıxlıqlar və tıxaclar isə, şəhərin yol infrastrukturunun daimi yenilənməyə ehtiyacı olduğunu göstərir. Bu, sərnişinlərin gözləmə müddətini artırır və mütəmadi narazılıqlar yaradır.

Müəllif: Elmir Muradov