13:54 - 5.09.2026

---

5 Sentyabr, Fineko/abc.az. Bakıda Kənd Təsərrüfatı Nazirliyinə məxsus "Aqrar Tədarük və Təchizat" ASC və "Azərbaycan Arıçılar Assosiasiyası" İB-nin birgə təşkilatçılığı ilə 26-cı Arıçılıq Məhsullarının Respublika Sərgi-Satış Yarmarkası təşkil olunacaq. Tədbirdə iştirak etmək istəyən fermerlər üçün onlayn qeydiyyat prosesi 7 sentyabr saat 11:00-dan 9 sentyabr saat 23:59-a qədər bal.kendden.az portalı üzərindən aparılacaq.

Yarmarkada iştirak şərtləri və qaydaları:

• Məhdudiyyət və tələblər: Qeydiyyatdan yalnız Elektron Kənd Təsərrüfatı İnformasiya Sistemində (EKTİS) 1 sentyabr 2026-cı il tarixinədək minimum 40 arı ailəsi bəyan etmiş fermerlər keçə biləcək. Seçilən arıçılara SMS vasitəsilə bildiriş göndəriləcək.

• Satış kvotası: Hər bir fermer yarmarkaya maksimum 450 kq bal (qablaşdırma daxil) və 30 ədəd şan çıxara bilər.

• Keyfiyyət nəzarəti: Azərbaycan Qida Təhlükəsizliyi Agentliyinin (AQTA) mütəxəssisləri tərəfindən məhsullardan saxaroza nümunələri götürülərək laboratoriyada yoxlanılacaq. Standartlara cavab verməyən ballar satışa buraxılmayacaq.