10:15 - 3.07.2026

---

3 iyul, Fineko/abc.az. “Azəristiliktəchizat” ASC-nin ümumi aktivlərində cüzi artım qeydə alınsa da, öhdəlikləri azaldılıb.

Bu barədə qurumun 31 dekabr 2025-ci il tarixinə olan illik maliyyə hesabatında qeyd edilib. Şirkətin cəmi aktivləri 2024-cü illə müqayisədə 0.31% artaraq 163 milyon 262 min manatdan 163 milyon 775 min manata yüksəlib.

Aktivlərin əsas hissəsini təşkil edən uzunmüddətli aktivlər (əmlak, tikili və avadanlıqlar) isə 0.06% artımla 128.9 milyon manat olub.

Cari aktivlərin tərkibində mal-material ehtiyatlarında artım müşahidə olunub. Bu göstərici ötən ilə nisbətən 22.5% artaraq 5 milyon manatdan 6.1 milyon manata çatıb.

Hesabat dövründə ASC-nin cəmi öhdəliklərinin 13.2% azalaraq 87.2 milyon manatdan 75.7 milyon manata enib. O cümlədən, uzunmüddətli borc öhdəlikləri 29% (11 milyon manata) azaldılıb.

Şirkətin yığılmış zərəri 6% (təxminən 7.3 milyon manat) azalaraq 122.2 milyon manatdan 114.8 milyon manata düşüb.