16:27 - 29.07.2025

---

29 iyul, Fineko/abc.az. Bu ilin I rübündə “.az” domen zonasında fəaliyyət göstərən 60 veb-resursa haker müdaxiləsi qeydə alınıb.

ABC.AZ xəbər verir ki, bu barədə “CYBER ON” şirkətinin apardığı monitorinqlər belə deməyə əsas verir.

Araşdırmalara əsasən, kibermüdaxilələrin 42 %-i təhlükəsiz kodlaşdırmanın düzgün aparılmaması, 58 %-i isə server sazlamalarının düzgün qurulmaması ilə bağlı olub.

Bundan əlavə müəyyən edilib ki, hücumların 18-i serverə, 13-ü isə kod səviyyəsində müdaxilələrlə bağlı olub. Qalan 29 halda isə hücumun mənbəyini və üsulunu müəyyən etmək mümkün olmayıb. Eyni zamanda, məlum olub ki, haker hücumuna məruz qalan 6 veb-resurs əvvəlki zəifliklər aradan qaldırılmadığı üçün təkrarən hədəfə çevrilib. Bu hallarda məsul şəxslər mövcud çatışmazlıqların aradan qaldırılması üçün effektiv tədbirlər görməyiblər.

Kibermüdaxilə halları aşkarlanan veb-resursların ölkələr üzrə statistikasına nəzər saldıqda onların 82 %-nin ABŞ, 5 %-nin Almaniya, 5 %-nin Azərbaycan, 4 %-nin Rusiya, 4 %-nin İngiltərədə saxlanıldığı (Hosting) müəyyən olunub.