11:11 - 3.06.2025
3 iyun, Fineko/abc.az. Azərbaycanda son illərdə bir sıra market şəbəkələri müxtəlif səbəblərdən fəaliyyətini dayandırıb və ya struktur dəyişikliyinə məruz qalıb.
ABC.AZ sözügedən marketlər barədə araşdırma aparıb. Bağlanmış şəbəkələrdən bəziləri haqqında məlumat təqdim olunur:
1. AL Market
2025-ci ilin may ayında yayılan xəbərlərə görə, Azərbaycanın rayon və kəndlərində fəaliyyət göstərən "AL Market" şəbəkəsinin bir sıra filialları, o cümlədən Saatlı, İmişli və Sabirabad rayonlarındakı mağazalar bağlanıb.
Bağlanmanın əsas səbəbi kimi bu filialların rentabelli olmaması göstərilir.
2. Rahat Market
2016-cı ildə "Rahat Market" şəbəkəsi maliyyə çətinlikləri ilə üzləşərək bir sıra filiallarını bağlayıb. Məlumatlara görə, 28 mağazadan 10-u fəaliyyətini dayandırıb və yüzlərlə işçi iş yerini itirib.
3. Lider-AS
2017-ci ilin yanvar ayında Bakıda fəaliyyət göstərən "Lider-AS" supermarketlər şəbəkəsi fəaliyyətini dayandırıb.
Şirkətin direktoru İsmayıl İsmayılov bağlanmanın səbəbi kimi ticarətin zəifləməsi və ziyanla işləməni göstərib.
4. Bizim Market
"Bizim Market" şəbəkəsi də fəaliyyətini dayandıran marketlər sırasındadır. Məlumatlara görə, bu şəbəkə "Mega Store" ilə birləşdirilib və artıq müstəqil fəaliyyət göstərmir.
5. Ramstore
Bir zamanlar Bakının ilk hipermarketi hesab olunan "Ramstore" supermarketlər şəbəkəsi də fəaliyyətini dayandırıb.
Hazırda bu şəbəkənin mağazaları "Bazarstore" brendi altında fəaliyyət göstərir.
6. SPAR
Qeyd edək ki, 2019-cu ildə Bakı şəhəri, Sabunçu rayonu, Bakıxanov qəsəbəsində yerləşən SPAR supermarketi fəaliyyətini dayandırıb.
Bu bağlanmaların əsas səbəbləri arasında maliyyə çətinlikləri, rentabelliyin azalması və bazar rəqabətinə davam gətirə bilməmək kimi faktorlar göstərilir.
Bəzi hallarda isə marketlər struktur dəyişikliyi və ya birləşmə nəticəsində fəaliyyətlərini dayandırıblar.
Müəllif: Elmir Murad
