16:29 - 24.06.2026

---

24 iyun, Fineko/abc.az. 2026-cı ilin yanvar-may aylarında Azərbaycanın ümumi sığorta bazarında həm sığorta haqlarının toplanmasında, həm də öhdəliklərin icrasında ciddi aktivlik qeydə alınıb. Bazarın ümumi böyüməsində həyat sığortası seqmenti əsas hərəkətverici qüvvə olub.

ABC.AZ rəsmi sığorta hesabatlarına istinadən xəbər verir ki, ilin ilk 5 ayında ölkə üzrə sığorta şirkətləri tərəfindən ümumilikdə 732,6 milyon manat sığorta haqqı yığılıb, müştərilərə edilən ümumi ödənişlərin həcmi isə illik müqayisədə 30,1% artaraq 409,6 milyon manat təşkil edib.

Ümumi bazar fonunda həyat sığortası seqmentinin göstəriciləri:

•      Yığımların dinamikası: Həyat sığortası üzrə yığımlar ümumi sığorta haqlarının təxminən 55%-ni təşkil edərək, ötən ilin eyni dövrü ilə müqayisədə 13% (45,9 milyon manat) artıb və 399,3 milyon manata çatıb. (2025-ci ilin ilk 5 ayında bu rəqəm 353,4 milyon manat idi).

•      Ödənişlərdə kəskin sıçrayış: Hesabat dövründə həyat sığortası üzrə ödənişlər ötən ilin müvafiq dövrünə (201 milyon manat) nəzərən 41,6% (83,7 milyon manat) çoxalaraq 284,7 milyon manat təşkil edib və ümumi bazar ödənişlərinin böyük hissəsini rəsmiləşdirib.