14:00 - 6.06.2026

---

6 iyun, Fineko/abc.az. Beynəlxalq reytinq agentliyi "Fitch Ratings" qlobal neft bazarı ilə bağlı növbəti hesabatını dərc edib. Agentlik, Hörmüz boğazının iyul ayının sonunda yenidən açılacağı ssenari çərçivəsində, 2026-cı il üçün "Brent" markalı neftin orta hesabla 87 dollar olacağı barədə proqnozunu dəyişməz saxlayıb.

ABC.AZ xəbər verir ki, hesata əsasən, Hörmüz boğazının bağlanması qlobal neft bazarında logistik mənşəli tədarük şoku yaratsa da, bu vəziyyət bazarın ümumi fundamental mənzərəsini dəyişməyib. Reytinq agentliyi cari ilin sentyabr ayından etibarən neft bazarında yenidən təklif fazlalığının (arz fazlası) yaranacağını gözləyir.

Qiymət və hasilat proqnozları:

• Hörmüz boğazı ssenarisi: "Fitch"in 87 dollarlıq qiymət proqnozu boğazın təxminən 5 ay qapalı qaldıqdan sonra iyulun sonuna qədər açılacağı fərziyyəsinə əsaslanır. Lakin açılış təqvimi ilə bağlı qeyri-müəyyənlik və risklər hələ də qalmaqdadır.

• Müvəqqəti təsir: Agentlik vurğulayır ki, hazırkı qiymət artımları hasilat güclərinin daimi itkisindən deyil, müvəqqəti logistik gərginlikdən qaynaqlanır. Boğaz fəaliyyətini bərpa etdikdən sonra "Brent" nefti mart-iyul aylarındakı yüksək səviyyələrdən kəskin şəkildə geriləyəcək.

• Hasilatın azalması: Strateji ehtiyatların istifadəsi nəzərə alınmadıqda, 5 aylıq bağlanma səbəbindən 2026-cı ildə qlobal neft tədarükü əvvəlki illə müqayisədə gündəlik orta hesabla 2,9 milyon barel daha az reallaşacaq.

Sentyabr ayından etibarən təklif bolluğu gözlənilir:

Bölgənin neft infrastrukturuna ciddi ziyan dəymədiyini qeyd edən "Fitch", Yaxın Şərq hasilatının sürətlə bərpası, OPEC+ daxil olmayan ölkələrin güclü tədarük artımı və rəsmi kotaların üzərinə çıxa biləcək istehsal gücü sayəsində payızdan etibarən bazarda bolluq yaranacağını proqnozlaşdırır.

"OPEC-in yürüdəcəyi siyasətdən asılı olaraq, 2026-cı ilin son rübündə gündəlik təxminən 4 milyon barel həcmində təklif artıqlığının yaranacağını gözləyirik. Bu vəziyyət anbarlarda ehtiyatların toplanmasına yol açaraq neft qiymətlərini aşağı salacaq. Bütövlükdə, 2026-cı ilin ümumi ortalamasında qlobal təklif tələbi üstələyəcək".