10:30 - 13.05.2026

---

13 may, Fineko/abc.az. Aprel ayında Fars körfəzi ölkələri (İraq, Səudiyyə Ərəbistanı, Küveyt, BƏƏ, Qətər və Bəhreyn) neft hasilatını sutkada 10,5 mln barelə qədər azaldıblar ki, bu da əvvəlki gözləntilərdən yüksəkdir. Əsas səbəb Hörmüz boğazının bağlanmasıdır və buna görə tədarüklərin bərpası 2026-cı ilin sonu – 2027-ci ilin əvvəlinə qədər uzana bilər.

ABC.AZ xəbər verir ki, Enerji İnformasiya İdarəsi (EIA) 2026-cı il üzrə maye karbohidrogenlərin qlobal hasilat proqnozunu 101,6 mln b/s səviyyəsinə endirib (əvvəlki proqnozdan 2,67 mln b/s az). Bu isə 2025-ci illə müqayisədə 4,75 mln b/s azalma deməkdir. Eyni zamanda, neft ehtiyatlarının gözləniləndən daha sürətlə — 2,6 mln b/s azalacağı proqnozlaşdırılır.

Hasilatın azalmasının pik həddi may ayında (10,8 mln b/s-ə qədər) gözlənilir. Ən çox azalma Səudiyyə Ərəbistanı, İraq, Küveyt və BƏƏ-də qeydə alınıb. Bundan əlavə, BƏƏ-nin OPEC-dən çıxması bazara təsir edərək alyansın sərbəst istehsal gücü proqnozunu 2027-ci ilə qədər 2,5 mln b/s-ə endirib.