17:14 - 5.02.2026

---

5 fevral, Fineko/abc.az. Amazon uzun müddət onlayn ticarət hesabına Walmart-ı qabaqlasa da, indi strategiyasını dəyişərək iri oflayn mağazalara üstünlük verir.

ABC.AZ xəbər verir ki, şirkət Amazon Fresh və Amazon Go formatlarını bağlayaraq onları Whole Foods brendi altında birləşdirib və Çikaqo yaxınlığında sahəsi 225 min kvadrat fut olan ilk meqamarketini açıb. Yeni mağaza ərzaq, gündəlik tələbat malları və həmin gün çatdırılma xidməti təklif edir.

Analitiklərin proqnozlarına görə, Amazon-un fiziki mağazalardan əldə etdiyi gəlir IV rübdə ötən illə müqayisədə 5,4% artaraq 5,9 milyard dollara çatacaq. AWS bölməsinin sürətli artımına baxmayaraq, pərakəndə satış biznesin əsas hissəsi olaraq qalır: ərzaq və gündəlik tələbat malları alan müştərilər ən yüksək uzunmüddətli dəyəri yaradır.

Bununla belə, ekspertlər oflayna yönəlmənin uzunmüddətli üstünlük olub-olmayacağına şübhə ilə yanaşırlar. Eyni zamanda Walmart 4600 mağazadan ibarət geniş şəbəkəsi və Walmart+ üzvlük proqramı sayəsində mövqelərini gücləndirir, bu da ona özügötürmə və həmin gün çatdırmanı daha sürətli və ucuz təşkil etməyə imkan verir və Amazon üzərində gündəlik tələbat malları bazarında təzyiq yaradır.