10:31 - 23.01.2026

---

23 yanvar, Fineko/abc.az. Azərbaycanın 2025-ci ilin ilk 11 ayı üzrə smartfon idxalı 1 milyon 198.9 min ədəd təşkil edib və idxalın dəyəri 394.51 milyon ABŞ dolları olub.

ABC.AZ xəbər verir ki, 2024-cü ilin eyni dövrü ilə müqayisədə idxal olunan smartfonların sayı 7.29% azalsa da, dəyər ifadəsində idxal 8.03% artıb.

2025-ci ilin ilk 11 ayında Azərbaycana idxal olunan smartfonlarda əsas pay Çin və Vyetnamın payına düşüb. Çin mənşəli smartfonlar 954.3 min ədəd olmaqla ümumi idxalın 79.60%-ni təşkil edib, dəyər ifadəsində isə 302.35 milyon ABŞ dolları ilə ümumi idxalın 76.64%-nə bərabər olub.

Vyetnamdan idxal 230.5 min ədəd səviyyəsində olub ki, bu da həcmin 19.22%-ni, dəyər baxımından isə 84.07 milyon ABŞ dolları ilə 21.31%-ni təşkil edib.

Hindistanın payı daha məhdud olub: 13 201 ədəd və ya 1.10%, dəyər ifadəsində isə 7.86 milyon ABŞ dolları ilə 1.99%.

Orta idxal qiymətinə gəldikdə, 2025-ci ilin ilk 11 ayında bir smartfonun orta idxal qiyməti təxminən 329 dollar olub. 2024-cü ilin eyni dövründə bu göstərici 282 dollar səviyyəsində idi. Beləliklə, orta idxal qiyməti illik müqayisədə 16.52% artıb.