21:36 - 29.07.2026

---

29 iyul, Fineko/abc.az. İlon Maskın «SpaceX» şirkətinin iyunda keçirilən rekord İPO-sundan sonra səhmlərində kəskin qiymət enişləri yaşanıb. Uoll-Stritin aparıcı maliyyə nəhəngləri investorları bu dəyişkənlikdən və böyük itkilərdən qorumaq üçün xüsusi törəmə maliyyə alətləri işləyib hazırlayır.

«Morgan Stanley» və «Marex Group» da daxil olmaqla, azı beş iri maliyyə institutu səhmlərdəki düşüş riskini 50%-dək məhdudlaşdıran strukturlaşdırılmış borc alətlərinin buraxılması üçün rəsmi müraciət edib. Birja debütündən sonra əldə etdiyi maksimum səviyyədən 40%-dən çox dəyər itirən «SpaceX» səhmləri, son dövrlər yüksək ticarət həcmi və sərt qiymət tərəddüdləri ilə diqqət çəkir.

Bu dalğalanmalara qarşı təklif olunan strukturlaşdırılmış notlar sabit gəlirli qiymətli kağızların xüsusiyyətlərini törəmə alətlərlə birləşdirir. Onlar investorun maksimal gəlirliliyini müəyyən həddə çərçivəyə salsa da, mənfi istiqamətli kəskin çökmələrdən qorunma təmin edir. Bu alətlərdən əsasən böyük kapitala sahib fərdi investorlar, ailə ofisləri (family office) və peşəkar portfel menecerləri istifadə edir.

«Marex»dən 9 aylıq xüsusi müdafiə paketi

Yaradılan yeni maliyyə mexanizmlərinin təfərrüatları investorlara təqdim olunan müdafiə sistemini aydın göstərir:

• 9 aylıq xüsusi not: «Marex Group» tərəfindən təklif edilən bu məhsul, səhmin performansından asılı olmayaraq investorlara aylıq ən azı 1,8% faiz ödənişi vəd edir.

• Məbləğ qorunması: Vadənin sonunda səhm 35%-dək dəyər itirərsə, investisiya edilən əsas kapital tam qorunur. Yalnız düşüş bu həddi keçdikdə investorlar qalan risklə üz-üzə qalırlar.