11:30 - 14.04.2025
14 aprel, Fineko/abc.az. Türkiyənin bir sıra regionlarında hökm sürən 11 ilin ən güclü şaxtaları fermerlərə böyük ziyan vurub.
ABC.AZ xəbər verir ki, bu barədə kənd təsərrüfatı və meşə təsərrüfatı naziri İbrahim Yumaklı bildirib.
“Aprelin 10-dan 12-dək bir sıra rayonlarda temperatur mənfi 15 dərəcəyə enib, bəzi bölgələrdə son 30 ilin ən aşağı temperaturu qeydə alınıb. Təəssüf ki, bu cür hava nəticəsində 2014-cü ildən etibarən ilk dəfə məhsul üçün ən zərərli şaxtalarla qarşılaşdıq”, — deyə İbrahim Yumaklı yazıb.
Nazir bildirib ki, mütəxəssislər zərər çəkmiş təsərrüfatlara dəstək vermək üçün zərərin qiymətləndirilməsini aparırlar.
Qeyd edək ki, həftə ərzində Türkiyədə temperatur -7 dərəcəyə, bir sıra regionlarda isə -15 dərəcəyə enib. Anadolu Dövlət Agentliyinin məlumatına görə, ölkənin 81 əyalətindən 36-da məhsul dondan əziyyət çəkəcək.
