14:46 - 10.07.2026

---

10 iyul, Fineko/abc.az. “Volkswagen” xərclərin azaldılması və səmərəliliyin artırılmasına yönəlmiş genişmiqyaslı restrukturizasiya proqramına başlayır. Şirkət model sırasını demək olar ki, iki dəfə azaltmağı, istehsal gücünü ildə 10 milyon avtomobildən 9 milyona endirməyi və komplektasiyaları təxminən 75% sadələşdirməyi planlaşdırır.

Məlumata görə, islahat 100 minədək iş yerini əhatə edə və konsernin müasir tarixində olduqca iri dəyişiklik ola bilər. Mənbələrin bildirdiyinə əsasən, Almaniyada dördədək zavodun bağlanması nəzərdən keçirilir.

Şirkətin rəhbəri Oliver Blume bu addımları bazar şəraitinin pisləşməsi, rəqabətin artması (xüsusilə Çin istehsalçıları tərəfindən), yüksək xərclər və tənzimləmə təzyiqi ilə izah edib. Son illərdə konsernin rentabelliyi demək olar ki, iki dəfə azalıb.

Mümkün ixtisarlarla bağlı xəbərlər artıq işçilərin etirazlarına və IG Metall həmkarlar ittifaqının sərt reaksiyasına səbəb olub. Həmkarlar ittifaqı əmək münaqişəsi riskinin artdığını bildirib. Planların bir hissəsi hələ rəsmi şəkildə təsdiqlənməyib.