12:31 - 9.06.2026

---

9 iyun, Fineko/abc.az. Rusiya Federasiyasının Nəqliyyat Nazirliyi İranda vəziyyət sabitləşən kimi Rəşt–Astara dəmir yolu xəttinin tikintisinə başlamağı planlaşdırır.

ABC.AZ xəbər verir ki, bu barədə Rusiyanın nəqliyyat naziri Andrey Nikitin Sankt-Peterburq Beynəlxalq İqtisadi Forumu çərçivəsində məlumat verib.

Rusiya tərəfi artıq yüksək hazırlıq səviyyəsindədir və iranlı həmkarları ilə daimi əlaqə saxlayır. Koordinasiyada “Şimal–Cənub” nəqliyyat dəhlizinə cavabdeh olan baş nazir müavini Vitaliy Savelyev də iştirak edir.

İran tərəfi əməkdaşlığa hazır olduğunu təsdiqləyir.

Rusiya və İran 2023-cü ildə “Şimal–Cənub” layihəsi çərçivəsində İran və Azərbaycan arasında yerləşən 160 kilometrlik Rəşt–Astara dəmir yolu sahəsinin birgə tikintisinə dair saziş imzalayıb. Bu xətt Fars körfəzi limanlarına birbaşa çıxışı təmin edəcək.

Layihənin ümumi dəyəri 1,6 milyard avro təşkil edir. Moskva və Tehran layihənin layihələndirilməsi, tikintisi, həmçinin mal və xidmətlərin tədarükünü birgə maliyyələşdirəcək.