14:58 - 22.12.2023

---

22 dekabr, Fineko/abc.az. Sumqayıt Kimya Sənaye Parkının rezidenti “UPI - Universal Packing Industry” Qapalı Səhmdar Cəmiyyəti gələn ilin əvvəlindən tam gücü ilə fəaliyyətə başlayacaq. 

ABC.AZ xəbər verir ki, bunu QSC-nin direktoru Fikrət Vəliyev deyib.

Onun sözlərinə görə, qablaşdırma məhsullarının (qofro karton, fayl və s.) istehsalı müəssisəsi olan “UPI - Universal Packing Industry” artıq 500 minə yaxın fayl istehsal edib. Bu fayllar daxili bazarın tələbatının ödənilməsinə yönəldilib.

Müəssisə karton istehsalına başlamaq üçün tələb olunan xammalı Rusiyadan alacaq. Rusiyadan 380 min ton kağızın gətirilməsi, gələn ilin əvvəlindən isə karton istehsalına başlanılması nəzərdə tutulur. İlkin mərhələdə ay ərzində təqribən 500 min kvadratmetr karton istehsal ediləcək. Sonrakı mərhələlərdə karton istehsalının 25 milyon kvadratmetrədək artırılması planlaşdırılır.

Qeyd edək ki, müəssisənin ümumi investisiya dəyəri 4,8 milyon manatdan artıqdır. Zavod bu ilin oktyabr ayından fəaliyyətə başlayıb.