17:23 - 11.04.2023

---

11 aprel, Fineko/abc.az. Xəbər verdiyimiz kimi, Energetika Nazirliyi 2023-cü ilin yanvar-mart ayları üzrə operativ məlumatları təqdim edib.

ABC.AZ xəbər verir ki, məlumatlarda “Azəri-Çıraq-Günəşli” və “Şahdəniz” yataqları istismara veriləndən 01 aprel 2023-cü il tarixinədək “Azəri-Çıraq-Günəşli”dən 207 milyard kubmetr, “Şahdəniz”dən isə 189 milyard kubmetr qaz hasil edildiyi qeyd edilib.

Bu dövrdə “Şahdəniz” yatağından hasil edilən qazın 133 milyard kubmetrə yaxını ixraca nəql edilib.

2023-cü ilin 1-ci rübü üzrə ölkədə 7,7 milyon ton neft (kondensatla birlikdə) hasil edilib. Respublika üzrə neft hasilatının 4,7 milyon tonu “Azəri-Çıraq-Günəşli”nin, 1,1 milyon tonu (kondensat) “Şahdəniz”in payına düşüb. SOCAR üzrə neft (kondensatla birlikdə) hasilatı 1,9 milyon ton təşkil edib.