12:21 - 19.12.2019

---

19 dekabr, Fineko/abc.az. Dövlət Statistika Komitəsindən  verilən məlumata görə, on bir ayda ölkənin neft-qaz sektoruna 4 milyard 800,5 milyon manat vəsait yönəldilib.

Qeyd olunur ki, cari ilin yanvar-noyabr aylarında neft-qaz sektorunda 27 milyard 905,3 milyon manatlıq məhsul istehsal olunub. Sənayenin bu sektorunda məhsul istehsalı əvvəlki ilin eyni aylarına nisbətən 0,2 faiz azalıb. Neft-qaz sektorunda istehsal olunmuş əlavə dəyər isə 0,2 faiz çoxalıb. Sənaye məhsulunun 70 faizi mədənçıxarma sektorunda istehsal edilib.

Noyabrda sənaye məhsullarının istehsalçı qiymətləri indeksi əvvəlki ayla müqayisədə 105,0 faiz, o cümlədən mədənçıxarma sənayesi üzrə 106,7 faiz olub.

Ötən ayın əvvəlinə iqtisadiyyatın neft-qaz sektorunda 34,9 min nəfər çalışıb. Yanvar-oktyabr aylarında neft-qaz sektorunda nominal əməkhaqqı isə 3060,8 manat təşkil edib.