15:01 - 2.10.2026

---

2 Oktyabr, Fineko/abc.az. İtaliyanın Baş naziri Corciya Meloni Avropa Komissiyasının sədri Ursulya fon der Lyayenə məktub ünvanlayaraq, artan enerji qiymətləri və inflyasiya təzyiqləri fonunda Avropa İttifaqının (Aİ) büdcə qaydalarında daha çox çeviklik təmin edilməsini tələb edib.

Meloni qeyd etdi ki, mövcud xərc limitləri sərt tədbirlərə əl atmadan ailələrə və bizneslərə dəstək olmaq üçün çox az imkan yaradır.

Aİ Komissiyası isə bu tələbə mənfi reaksiya verib. Komissiyanın sözçüsü Paula Pinyo üzv ölkələrə artıq lazımi çevikliyin tanındığını bəyan edib.

Öz növbəsində, İtaliyanın iqtisadiyyat naziri Cankarlo Corcetti hökumətin maksimum icazə verilən həddi – enerji təhlükəsizliyi üçün ÜDM-in 0,6%-i və müdafiə üçün ÜDM-in 0,9%-i həcmində vəsaiti tələb etmək niyyətində olduğunu açıqladı.