11:55 - 1.09.2026

---

1 Sentyabr, Fineko/abc.az. ABŞ-ın "Chevron" və "GE Vernova", Hindistanın "ONGC", İtaliyanın "Eni" və Kolumbiyanın "GeoPark" şirkətləri Venesuelada enerji layihələrini həyata keçirmək üçün aylardır davam edən danışıqlardan sonra yekun sazişləri imzalamaq üzrədirlər. Bu barədə hazırlıq prosesinə yaxın olan beş məlumatlı mənbə bildirib.

OPEC üzvü olan Venesuelanın energetika sektoruna iri xarici investisiyaların cəlb edilməsi məqsədi daşıyan bu razılaşmalar ölkədə neft hasilatının və elektrik enerjisi infrastrukturu imkanlarının bərpasına yönəlib. Mənbələrin verdiyi məlumata görə, müqavilələr həm mövcud neft yataqlarının birgə işlənilməsini, həm də energetika şəbəkələrinin modernləşdirilməsini əhatə edir.

Bu addım Vaşinqtonun Venesuela ilə yeni kommersiya və neft sazişlərini dəstəkləməsi fonunda qlobal enerji nəhənglərinin ölkə bazarına qayıdışını və fəaliyyətlərini genişləndirməsini rəsmiləşdirəcək. Şirkətlər və Venesuelanın dövlət neft şirkəti (PDVSA) tərəfindən sazişlərin yaxın vaxtlarda imzalanması gözlənilir.