11:51 - 13.04.2026
13 aprel, Fineko/abc.az. ABŞ prezidenti Donald Trampın Hörmüz boğazının mümkün blokadası ilə bağlı açıqlamalarından sonra qızılın qiyməti təxminən 2% azalıb.
ABC.AZ xəbər verir ki, Comex birjasının 13 aprel tarixli məlumatına görə, iyun fyuçersləri üzrə qızılın qiyməti bir troya unsiyası üçün 4690,1 dollara qədər enib (–1,94%). May fyuçersləri üzrə gümüşün qiyməti də 3,57% azalaraq 73,748 dollar olub.
Xatırladaq ki, 11 apreldə iki həftəlik atəşkəs elan edildikdən sonra ABŞ və İran arasında İslamabadda danışıqlar başlayıb. ABŞ-ın vitse-prezidenti Cey Di Vensin sözlərinə görə, tərəflər uzunmüddətli razılaşmanın şərtləri üzrə razılığa gələ bilməyiblər.
12 apreldə Tramp bildirib ki, ABŞ Hörmüz boğazını bloklaya bilər və ölkənin Hərbi Dəniz Qüvvələri bu boğazdan keçid üçün İrana ödəniş edən gəmiləri ələ keçirə bilər.
