09:59 - 19.09.2025
19 sentyabr, Fineko/abc.az. “Intel” (INTC) səhmləri 18 sentyabrda premarket ticarətində 34,26% bahalaşaraq 33,43 dollara çatıb.
ABC.AZ xəbər verir ki, kotirovkaların kəskin artımı “Nvidia”nın “Intel”ə 5 milyard dollar investisiya qoymağı planlaşdırması xəbəri fonunda baş verib.
“Nvidia” “Intel”in səhmlərini bir səhm üçün 23,28 dollara alacaq. Bildirilir ki, şirkət “Nvidia”nın qrafik texnologiyasından gələcək PC çiplərində istifadə edəcək, həmçinin “Nvidia” avadanlığı əsasında yaradılmış məlumat mərkəzi məhsulları üçün öz prosessorlarını tədarük edəcək.
“Intel” də “Taiwan Semiconductor Manufacturing” (TSMC) və “Samsung Electronics” kimi dünyada ən müasir kompüter çiplərini istehsal edən üç şirkətdən biridir və bu sahədə ABŞ-də yerləşən yeganə şirkətdir.
2025-ci ilin ikinci rübündə “Intel” 2,92 milyard dollar xalis zərər əldə edib. Rüb üzrə gəlir 12,86 milyard dollar təşkil edib, bir il əvvəl isə bu rəqəm 12,83 milyard dollar olub. Şirkət həmçinin bildirib ki, kadrların azaldılmasını davam etdirməyi planlaşdırır — ilin sonuna qədər işçilərin sayının 75 min nəfərə endirilməsi nəzərdə tutulur ki, bu da 2024-cü ilin sonundakı göstəricidən 22% azdır.
