11:34 - 29.08.2025

---

29 avqust, Fineko/abc.az. 2025-ci ilin ötən dövründə Sumqayıt şəhərində ümumi məhsul istehsalı 2015-ci illə müqayisədə 6 dəfə artaraq 850 milyon manatdan 5 milyard 100 milyon manata yüksəlib.

ABC.AZ xəbər verir ki, sənaye məhsulu istehsalının həcmi isə 8 dəfə artaraq 4 milyard manata çatıb.

Bu illər ərzində orta aylıq əməkhaqqı 400 manatdan 850 manata qədər artıb. Əsas kapitala yönəldilən investisiyaların həcmi də 140 milyon manatdan 420 milyon manata yüksələrək 3 dəfə artıb.

Əhali sayında da artım müşahidə olunub. 2015-ci ildə 336 min nəfər olan şəhər əhalisi 2025-ci ildə 428 min nəfərə çatıb. Məşğul əhalinin sayı isə 100 mindən 190 min nəfərə qədər artıb.

Bildirilib ki, sənaye müəssisələrinin sayı da əhəmiyyətli dərəcədə çoxalıb. 2015-ci ildə 124 müəssisə fəaliyyət göstərirdisə, 2025-ci ildə bu göstərici 327-yə çatıb.

Adambaşına düşən illik gəlir 2015-ci ildə 3 400 manat olduğu halda, 2025-ci ildə 5 600 manata yüksəlib. (Report)