16:04 - 27.09.2024

---

27 sentyabr, Fineko/abc.az. Bakı "Azərbaycanın ərazi bütövlüyünü sual altına qoyan" Ermənistan Konstitusiyasını Yerevanla sülh sazişinin əldə edilməsinə maneə hesab edir.

ABC.AZ xəbər verir ki, bunu La Repubblica qəzetinə müsahibəsində Azərbaycan prezidentinin köməkçisi, dövlət başçısı Administrasiyasının xarici siyasət məsələləri şöbəsinin müdiri Hikmət Hacıyev deyib.

"Biz sülhə hər zamankindən daha yaxınıq, amma irəliyə getməyə imkan verməyən maneələr hələ də qalmaqdadır. Birincisi, Ermənistanın Konstitusiyasıdır, orada müstəqilliyin təsdiq edilməsi haqqında hissədə Ermənistanın Qarabağdakı Azərbaycan əraziləri ilə birləşməsinin göstəricisi var. Biz təkcə Ermənistan hökuməti ilə deyil, həm də Azərbaycan ərazilərinə iddialarından əl çəkərək konstitusiyanın dəyişdirilməsi ilə bağlı referendum tələb etməli olan ölkə xalqı ilə sülhə nail olmaq istəyirik", - deyə o bildirib. Onun sözlərinə görə, Azərbaycan üçün regionda sülhə xələl gətirən revanşizmin geri qaytarılmasına təminatların olması vacibdir. "Referendum lazımdır, bu müddət ərzində ermənilər Qarabağa iddiaları dəstəkləmədiklərini nümayiş etdirəcəklər", - deyə məmur əlavə edib.

O, həmçinin qeyd edib ki, Ermənistanın hərbiləşdirilməsi "məsuliyyətli və proporsional" olmalıdır və İrəvanın Fransadan Azərbaycan şəhərlərini vura biləcək uzun mənzilli raketlər almasından narahatlığını ifadə edib. "Ermənistan üçün ən yaxşı həll Azərbaycana qarşı hərbi alyansların yaradılması deyil, neytrallıq olardı", - deyə Hacıyev qeyd edib.

Onun sözlərinə görə, Bakı Fransa da daxil olmaqla, "müstəmləkə təcrübəsi olan" bəzi Qərb ölkələri tərəfindən Ermənistanı revanşist istəklərində səhvən dəstəkləmək cəhdlərini görür. "Bu, bütün Avropa üçün əks nəticə verir", — deyə o vurğulayıb.