10:22 - 24.08.2023

---

24 avqust, Fineko/abc.az. Bu ilin yanvar-iyul aylarının yekunlarına görə, Azərbaycandakı 20 sığorta şirkətindən 15-nin yığımları illik müqayisədə artıb, 5-nin isə yığımları azalıb.

ABC.AZ "Renkinq" ə istinadla xəbər verir ki, bu barədə Mərkəzi Bankın açıqladığı statistik hesabatda bildirilir.

Hesabata əsasən, son 1 ildə yığımları illik müqayisədə ən çox artan şirkət "Azərsığorta" ASC-dir. Bu şirkət 7 ay ərzində 18,618 milyon manat sığorta haqqı toplayıb ki, bu da 1 il əvvələ nisbətən 2,9 dəfə çoxdur. Daxilolmaları ən az artan şirkət isə “Günay Sığorta” ASC-dir. Bu şirkətin daxilolmaları 4,301 milyon manat təşkil edib ki, bu da 1 il əvvələ nisbətən 5,4% çoxdur.

Yığımları azalan şirkətlər arasında ən pis vəziyyət “Xalq Sığorta” ASC-dədir. Bu şirkətin daxilolmaları 40,7% azalaraq 13,447 milyon manat olub. Yığımlarda azalma baxımından ən yaxşı vəziyyət isə “A-Qrup Sığorta” ASC-dədir. Bu şirkətin daxilolmaları 1% azalaraq 10,955 milyon manata düşüb.