16:57 - 22.07.2026

---

22 iyul, Fineko/abc.az. Özbəkistanda islam banklarının lisenziyalaşdırılması və mövcud banklarda “islam pəncərələri”nin açılması üçün tələblər müəyyən edilib.

Məlumata görə, əməliyyatları yalnız Mərkəzi Bankın icazəsini almış təşkilatlar həyata keçirə biləcək. Ayrıca islam bankının yaradılması və ya ənənəvi bank daxilində ayrıca uçot və maliyyə axınlarına malik ixtisaslaşmış bölmənin açılması olmaqla iki model nəzərdə tutulur.

İslam maliyyələşməsi faizləri istisna edir və ticarət, icarə, tərəfdaşlıq və risklərin bölüşdürülməsi prinsiplərinə əsaslanır. Lisenziya almaq üçün banklar islam maliyyə şurası (ən azı 3 nəfər) yaratmalı, bu sahə üzrə rəhbər təyin etməli, daxili nəzarət sistemi qurmalı və standartlara uyğunluq siyasəti hazırlamalıdır. Üzvlərdən müvafiq təhsil, təcrübə və AAOIFI sertifikatı tələb olunur (2027-ci ildən etibarən bütün şura üzvləri üçün).

Mərkəzi Bank AAOIFI-yə qoşulub və standartların özbək dilinə tərcüməsi planlaşdırılır. İslahatın məqsədi maliyyə xidmətlərinə çıxışı genişləndirmək, investisiyaları cəlb etmək və bank sektorunda rəqabəti artırmaqdır. Bu yeniliklər xüsusilə dini səbəblərlə ənənəvi bank məhsullarından istifadə etməyən müştərilər üçün cəlbedici ola bilər.