23:00 - 11.06.2026

---

11 iyun, Fineko/abc.az. Niderlandın nüfuzlu "ING" bank qrupu Azərbaycan iqtisadiyyatına dair növbəti hesabatını dərc edərək inflyasiya gözləntilərini yuxarı doğru yeniləyib. Eyni zamanda, Dövlət Statistika Komitəsi (DSK) cari ilin ilk 5 ayının yekun makroiqtisadi və ÜDM göstəricilərini təqdim edib.

ABC.AZ bankın rəsmi hesabatına və DSK-nın rəqəmlərinə istinadən xəbər verir ki, "ING" analitikləri Azərbaycanda orta illik inflyasiyanın 2026 və 2027-ci illərdə 5,5% səviyyəsində sabit qalacağını proqnozlaşdırırlar. Əvvəlki hesabatda bu göstəricilər müvafiq olaraq 5,4% və 5,2% təşkil edirdi. 2028-ci ildə isə qiymət artımının 5,3%-ə qədər zəifləyəcəyi gözlənilir.

Rüblər üzrə inflyasiya proqnozları:

• 2026-cı il: II rübdə 5,5%, III rübdə 5,4%, IV rübdə isə 5,6%.

• 2027-ci il: I rübdə 5,5%, II rübdə 5,6%, III və IV rüblərdə isə 5,5%.

Cari makroiqtisadi vəziyyət (Yanvar-May): Beynəlxalq qurumun proqnozları fonunda ölkədaxili rəsmi statistika da real artım dinamikasını ortaya qoyur. DSK-nın son məlumatlarına əsasən, cari ilin yanvar-may aylarında istehlak qiymətləri indeksi (inflyasiya) ötən ilin müvafiq dövrü ilə müqayisədə 5,6% artıb ki, bu da "ING"-nin cari rüb üçün proqnozları ilə tam üst-üstə düşür.

Hesabat dövründə ölkədə 51,784 milyard manatlıq Ümumi Daxili Məhsul (ÜDM) istehsal edilib. Sektorlar üzrə əlavə dəyər istehsalı aşağıdakı kimidir:

• Neft-qaz sektoru: Əlavə dəyər 1% azalaraq 16,125 milyard manat təşkil edib.

• Qeyri-neft-qaz sektoru: Əlavə dəyər 0,4% artaraq 35,658 milyard manata çatıb.