14:55 - 3.02.2026

---

3 fevral, Fineko/abc.az. AB Şurası qaydaları təsdiqləyib ki, Türkiyə və Bolqarıstan sərhədindəki Strandja 1 / Malkočlar keçid nöqtəsindən Avropa İttifaqına daxil olan qaz, əvvəlcədən onun başqa mənşəli olduğunu göstərən sübutlar təqdim edilmədiyi halda, avtomatik olaraq Rusiya mənşəli hesab olunacaq.

ABC.AZ xəbər verir ki, bu keçid nöqtəsindən həm Azərbaycan və Türkiyə qazı, həm də Türk Axını vasitəsilə əhəmiyyətli həcmdə Rusiya qazı keçir.

AB-nin qaydalarına görə, Türkiyə və Azərbaycan idxaldan ən geci yeddi iş günü əvvəl qazın Rusiya mənşəli olmadığını təsdiqləməlidirlər. Eyni mexanizm digər tranzit nöqtələrinə də tətbiq olunacaq.

Rusiya LNG-nin AB-yə tədarükü üzrə tam qadağa 1 yanvar 2027-ci il, boru kəməri qazı üzrə isə 30 sentyabr 2027-ci il tarixindən qüvvəyə minəcək.