12:02 - 29.07.2025

---

29 iyul, Fineko/abc.az. İyulun 27-də Iran Air aviaşirkətinin EP-7820 nömrəli ATR-72 təyyarəsi Şəhid Mədani adına Beynəlxalq Hava limanından Bakıya yola düşüb. Beləliklə, son onilliklərdə ilk dəfə olaraq Azərbaycanın paytaxtı ilə İran Azərbaycanın ən böyük şəhəri arasında birbaşa hava əlaqəsi yaradılıb.

ABC.AZ xəbər verir ki, uçuş vaxtı 1 saatdan az təşkil edəcək. Uçuşlar bazar ertəsi və cümə axşamı günləri həyata keçirilir. Təbrizdən uçuş saat 09:40-da (yerli vaxtla), Bakıdan qayıdış reysi isə saat 19:50-də həyata keçiriləcək.

Bir tərəfə bilet 115 manat (67 dollar), gediş-dönüş isə 215 manatdır.

Yeni reys ikitərəfli münasibətləri möhkəmləndirəcək, ailə və işgüzar əlaqələri asanlaşdıracaq.

Həmçinin Şərqi Azərbaycan (İran) əyaləti ilə Azərbaycan Respublikası arasında ticarət və turizmin inkişafı üçün imkanlar açılır. İşgüzar mübadilələrin, turist axınının artması və uçuş sektorunda yeni iş yerlərinin yaradılması gözlənilir.

Səfərlərin sadələşdirilməsi iki bölgə arasında mədəni, elmi və universitet əlaqələrinin dərinləşməsinə kömək edəcək.

Şəhid Mədani hava limanının səlahiyyətliləri, Təbrizi İranın şimal-qərbindəki hava nəqliyyatı qovşağına çevirmək üçün yaxın gələcəkdə yeni beynəlxalq istiqamətlər əlavə etmək planlarını açıqlayıb. Bakıya uçuşların tezliyinin artırılması və regionun digər şəhərlərinə marşrutların açılması imkanları nəzərdən keçirilir.

Bakıya növbəti reys iyulun 31-də saat 09:40-da Təbrizdən yola düşür. Biletlər İran Air və AZAL aviaşirkətlərinin saytlarında mövcuddur.