11:12 - 22.09.2026

---

22 sentyabr, Fineko/abc.az. Özbəkistan Naxçıvan Muxtar Respublikası vasitəsilə Türkiyənin Samsun və İstanbul limanlarına çıxış təmin edəcək yeni dəmir yolunun tikintisində iştirak imkanlarını nəzərdən keçirir.

Prezident Şavkat Mirziyoyevin sədrliyi ilə keçirilən nəqliyyat-logistika müşavirəsində bildirilib ki, layihə ölkənin yükdaşıma marşrutlarını şaxələndirmək, tekstil, kimya, kənd təsərrüfatı və metallurgiya məhsullarının ixracını genişləndirmək məqsədi daşıyır.

Xəzər dənizi və Cənubi Qafqaz dəhlizini əhatə edən bu marşrut Özbəkistanın Azərbaycan və Türkiyə ilə logistik əməkdaşlığını gücləndirməklə yanaşı, Mərkəzi Asiyanı Avropa bazarları ilə birləşdirən mühüm halqa olacaq.

Daşkənd administrasiyası 2030-cu ilədək nəqliyyat sahəsinə 9,1 milyard dollar investisiya cəlb etməyi və xidmət ixracını 5,7 milyard dollara çatdırmağı hədəfləyir.