14:52 - 7.01.2024

---

7 yanvar, Fineko/abc.az. İran ilə Azərbaycan arasında Astaraçay üzərində tikilən yeni avtomobil körpüsü iki ölkə arasındakı ticarət və tranzit əlaqələrinin inkişafına və iqtisadi artıma səbəb olacaq.

ABC.AZ Azərtac-a istinadən xəbər verir ki, bu sözləri İranın yollar və şəhərsalma naziri Mehrdad Bazarpaş hökumətin iclasında deyib. O bildirib ki, yeni körpü gün ərzində 300 yük avtomobilinin sərhəd məntəqəsindən keçməsinə imkan yaradıb. Köhnə körpü ilə gün ərzində yalnız 200 nəqliyyat vasitəsi keçə bilirdi.

Nazir qeyd edib ki, Rəşt-Astara dəmir yolunun tikintisi üzrə də Rusiya və Azərbaycan tərəfi ilə aparılan danışıqlar müsbət nəticələnib.

“Rusiya Rəşt-Astara dəmir yolunun tikintisinin davam etdirilməsi üçün 1,3 milyard avro kredit ayıracaq və 2027-ci ildə yolun istismara verilməsi nəzərdə tutulub”, - deyən nazir qeyd edib ki, bu yolun istismara verilməsi İran, Azərbaycan və Rusiyanın dəmir yolları sistemlərini birləşdirəcək.